Dua

Dena ho to aisa de yaa Rab, Har gum ki dawa hum ban jaye'n

Jo kabool ho har ek haalat mei'n, Bas aisi dua hum ban jaye'n

Chahe Mandir ho, chahe Masjid ho, Girjaghar ho chahe Gurudwara,

Jo goonje sabke aangan mei'n, Woh teri sada hum ban jaye'n

Hum phool ki khushboo ban jaye'n, Aur bikhar jaye'n har gulshan mei'n

Har jakhm ko jo chhookar bhar de, Woh baad-e-saba hum ban jaye'n

Humse na kabhi koi galti ho, Nafrat se hamesha door rahe'n

Jode jo dilo'n ko aapas mei'n, Woh Khuda ki wafa hum ban jaye'n

Patthar na bane'n hum raste ka, Jo chot kisiko pahu'nchaye

Risto'n mei'n daraare'n na ho jismei'n, Us ghar ka pata hum ban jaye'n

Ae "Ruh" dua ho kabool teri, Darbaar mei'n Uske, Insha-allah

Na kabhi bhi khata hum ban jaye'n, Na kisiki saza hum ban jaye'n

Ruh {Kranti}