Rishta

Man ka kahna maanke humne

Jeevan ka rukh mod diya hai

Khushiyon ki rahen chun lee hain

Gum ka daman chhod diya hai

Sookhisi sunsan rah ko

Halkasa ek mod diya hai

Patjhad ke saaye mein pali jo

Un galiyon ko chhod diya hai

Jabse ummiden jaagi hain

Yaas ka haath marod diya hai

Badal ka chanchal lahrata

Aanchal sar pe odh diya hai

Har seema ko langh chuke hain

Har ek bandhan tod diya hai

Bhool chuke sab rishte ab to

Khud se rishta jod diya hai