Ek Kali

Ek kali deti thi duhai, khilnese pahle jo murjhaee

Mali ne jab todke fenka, 'kis galti ki saza hai payee?'

Poori khilkar gandh lutati, ghar-angan ko sajaya hota

Meethi meethi muskanon se sabke dilko lubhaya hota

Ghar-angan soona kar tumne jane kaunsi daulat payee?

Naye jeev ki aahat sunke ghar main khushi ki lahar thi chhayi

Kahin duaen, kahin minnaten, kahin badhai, kahin mithai

Ladki hoon main pata chala jab, na jane kaunsi aafat aayee?

Tumko khushiyan dekar main bhi apna karz chuka sakti thi

Beti hona paap nahin hai, duniya ko main dikha sakti thi

Janam janam ke rishte tode, aur ye socha mukti payee!

Kiran, Indira, Lata, Kalpana, Pratibha, Sunita ban sakti thi

Inki tarah main naam tumhara jagmain roshan kar sakti thi

Kaash ke tumne jana hota beti nahin hoti hai parayee!

Kyon khilnese pahle tumpar bojh bani main? samjhao na!

Kya main tumhari dushman thi? Kyon mujhko mitaya, batlao na!

Toot chuke sab rishte ab to, kaisa Pita aur kaisee Mai!